သင့်မှာ HIV ရှိနေရင် ကလေးယူလို့ဖြစ်ရဲ့လား။

သင်ကို်ယ်တိုင် သို့မဟုတ် သင့်ရဲ့အဖော် သို့မဟုတ် နှစ်ယောက်စလုံးမှာ HIV ပိုးရှိနေတယ်ဆိုပါစို့။ရင်သွေးလေးတွေယူပြီး မိသားစုဘဝလေးတည်ဆောက်ချင်တယ်ဆိုတဲ့စိတ်ကူးလေးဟာ အကောင်အထည်ဖော်ဖို့ဖြစ်နိုင်ရဲ့လား။

အဓိကအားဖြင့်စိုးရိမ်ပူပန်တတ်ကြတာကတော့ မိမိရဲ့အဖော်ကိုပါ HIV ပိုးကူးသွားမှာ နဲ့ အရေးကြီးဆုံးအနေနဲ့ ရင်သွေးလေးကိုပါကူးစက်သွားမှာတွေပဲဖြစ်ပါတယ်။

ဒီနေရာမှာအုပ်စုနှစ်စုခွဲပြောလိုပါတယ်။

ယောကျာ်း သို့မဟုတ် မိန်းမတစ်ယောက်ယောက်မှာသာ ပိုးရှိနေတာ နဲ့ နှစ်ယောက်စလုံးပိုးရှိနေတာဆိုတဲ့ အုပ်စုနှစ်စုခွဲပြောရပါမယ်။

(၁)ပထမအုပ်စုမှာက ကလေးယူဖို့ဆုံးဖြတ်ပြီဆိုရင် အရင်ဆုံးကိုယ့်အဖော်ကိုမကူးစေဖို့သတိပြုရတာလေး ပိုပါမယ်။

– ယောကျာ်းဖြစ်သူက HIV Negative နဲ့ မိန်းမဖြစ်သူက HIV Positive ဆိုရင်…

လိင်မဆက်ဆံဘဲ ကိုယ်ဝန်ရအောင်လုပ်တဲ့နည်းကတော့ အမျိုးသားရဲ့သုက်ရည်ကို အပ်ဖြုတ်ထားတဲ့ဆေးထိုးအပ်နဲ့ယူပြီးအမျိုးသမီးရဲ့ မိန်းမကိုယ်ထဲထည့်သွင်းတဲ့နည်းပါ။ဒီနည်းကို မိမိဘာသာအိမ်မှာပြုလုပ်နိုင်သလို HIV Clinic တွေမှာကျွမ်းကျင်သူကျန်းမာရေးဝန်ထမ်းအကူအညီရယူပြီးလည်း လုပ်နိုင်ပါတယ်။

ပုံမှန်အတိုင်းလိင်ဆက်ဆံခြင်းဖြင့်လည်းကိုယ်ဝန်ရယူန်ိုင်ပါတယ်။အမျိုးသမီးရဲ့ သားဥကြွေချိန်မှာသာ လိင်ဆက်ဆံခြင်းကိုပြုလုပ်ခြင်းဖြင့် ကူးစက်နိုင်ချေကိုလျှော့ချပေးနိုင်ပါတယ်။အမျိုးသားဖြစ်သူကိုမကူးစက်စေဖို့အတွက် အမျိုးသမီးဟာ ART ဆေး(Antiretroviral treatment)ကိုရယူနေသူ သွေးထဲမှာ ပိုးကောင်ရေမရှိသလောက်နည်းပါးအောင်ထိန်းထားနိုင်သူဖြစ်ရပါမယ်။ဒီနည်းဟာတော့ အမျိုးသားကိုကူးစက်နိုင်ချေရှိတဲ့အတွက် PrEP လို့ခေါ်တဲ့ HIV ပိုးမကူးအောင်ကြိုတင်ကာကွယ်ဆေးသောက်စေတာမျိုးကိုလည်း ဆရာဝန်ကညွှန်ကြားနိုင်ပါတယ်။

– ယောကျာ်းဖြစ်သူက HIV Positive နဲ့ မိန်းမဖြစ်သူက HIV Negative ဆိုရင်…

ဒီအခြေအနေမျိုးမှာတော့ မိန်းမဖြစ်သူကိုမကူးစက်ရအောင် ယောကျာ်းဖြစ်သူမှာ HIV ပိုးကောင်ရေမတွေ့သလောက်နည်းပါးရမယ့်အပြင် ART ဆေးကိုပုံမှန်သောက်နေသူလည်းဖြစ်ရပါမယ်။လိုအပ်ရင် မိန်းမကိုလည်း PrEP လို့ခေါ်တဲ့ HIV ပိုးမကူးအောင်ကြိုတင်ကာကွယ်ဆေးသောက်တာမျိုးကိုလည်း ဆရာဝန်ကညွှန်ကြားနိုင်ပါတယ်။အမျိုးသမီးရဲ့ သားဥကြွေချိန်မှာသာ အကာအကွယ်မဲ့လိင်ဆက်ဆံခြင်းကိုပြုလုပ်ခြင်းဖြင့် ကူးစက်နိုင်ချေကိုလျှော့ချပေးနိုင်ပါတယ်။

တစ်ချို့သော နိုင်ငံတွေမှာတော့ အမျိုးသားရဲ့ သုက်ရည်ထဲက သုက်ပိုးကို HIV ပိုးမပါအောင် ဓာတ်ခွဲခန်းမှာ သေချာခွဲယူပြီးမှ အမျိုးသမီးရဲ့ ခန္ဓာကိုယ်ထဲထည့်ပေးတာမျုိးလည်း လုပ်တတ်ကြပါတယ်။

(၂)ဒုတိယအုပ်စုဖြစ်တဲ့ နှစ်ယောက်လုံးမှာ HIV ပိုးရှိနေရင်ရော ကလေးယူလို့ဖြစ်ရဲ့လားဆိုဖြစ်ပါတယ်။ဒီအုပ်စုအနေနဲ့ကတော့ ကလေးကိုမကူးစက်ဖို့သာ အာရုံထားရမှာဖြစ်ပါတယ်။

အမျိုးသမီးမှာ HIV ပိုးရှိနေရင် ကိုယ်ဝန်ရသွားပြီးတဲ့နောက်မှာ ကလေးကိုမကူးစက်အောင် ART ဆေးကို ပုံမှန်ဆက်လက်သောက်သုံးရပါမယ်။ကလေးမွေးပြီးတဲ့နောက်မှာလည်း ကလေးကိုကူးစက်ခြင်းမှကာကွယ်ဖို့လိုအပ်ရင် ကလေးကို ART ဆေးတိုက်ကျွေးဖို့ ဆရာဝန်ကညွှန်ကြားနိုင်ပါတယ်။ဒီအချက်တွေကိုလိုက်နာနိုင်ရင် မိခင်နို့ကိုလည်း တိုက်ကျွေးလို့ရပါတယ်။မိခင်နို့တိုက်ဖို့ရွေးသည်ဖြစ်စေ နို့မှုန့်တိုက်ဖို့ရွေးသည်ဖြစ်စေ အဓိကအားဖြင့်တော့ နှစ်မျိုးလုံးရောမတိုက်ဖို့ပါပဲ။ဥပမာ အစက မိခင်နို့တုိုက်ပြီးနောက်နို့ဗူးပြောင်းတိုက်တာ နို့ဗူးတိုက်နေရာမှ မိခင်နို့်ပြောင်းတိုက်တာမျိုးတွေကတော့ ကလေးကို ပိုးကူးနိုင်ခြေများတဲ့အတွက် မလုပ်သင့်ပါဘူး။ဒီလိုနည်းအတိုင်းလိုက်နာနိုင်ရင် ကလေးကို HIV ပိုးကူးနိုင်ချေဟာ လူ ၁၀၀ မှာတစ်ယောက်အောက် နည်းပါးပါတယ်။

HIV Positive ဖြစ်နေသူတွေအနေနဲ့လည်း သာမန်မိသားစုဘဝကိုတည်ဆောက်ရယူနိုင်ပါတယ်။ကျွမ်းကျင်သူကျန်းမာရေးဝန်ထမ်းများနဲ့ ကိုယ်ဝန်မယူခင်တိုင်ပင်ဆွေးနွေးတာ ကိုယ်ဝန်ရပြီး ကလေးမွေးပြီးဆက်လက်အကြံဥာဏ်ယူတာတွေပြုလုပ်ခြင်းဖြင့် မိမိရဲ့အဖော်နဲ့သားသမီးကို HIV ပိုးမကူးစက်အောင်တားဆီးကာကွယ်နိုင်ပါတယ်။ကျန်းမာသာယာသော မိသားစုဘဝများရရှိကြပါစေ။

Dr. ပွင့်ဖြိုးကျော်