ဘာကြောင့်ပါလိမ့်? (အပိုင်း ၂)
ခုရက်ပိုင်း ရာသီဥတုလေးလည်းကောင်းတော့ လူတွေလည်း အဖျားအနာသိပ်မရှိကြ…..

ဆေးခန်းလေး လူနာပါးပေမယ့် လူတွေကျန်းမာနေကြတာတွေ့ရတော့လည်း တစ်မျိုးစိတ်ချမ်းသာရပါတယ်….

ဟော….ပြောရင်းဆိုရင်းလာပါပြီ…..လူနာတော့မဟုတ်….ထုံးစံအတိုင်း ဦးတုတ်ကြီး……

တလောက လူနာလာလို့စကားစပြတ်သွားတာနဲ့ သူမေးချင်တာတွေ အကုန်မမေးလိုက်ရတော့…. ဒီနေ့လူနာအရှင်းစောင့်ပြီး လာတာနေမယ်….

ကျွန်တော် – အရင်တစ်ခေါက်က စကားစပြန်ဆက်ဖို့လားဗျ….

ဦးတုတ်ကြီး – ဟုတ်ပဗျာ…..ဘယ်ဆိုးလို့လဲ….ဆရာက မှတ်မိသားပဲ

ကျွန်တော် – မှတ်မိပါ့ဗျာ၊ ကဲ… လူနာရှင်းတုန်း သိချင်သမျှ အကြိုက်သာမေးပေတော့….

ဦးတုတ်ကြီး – ဟဲဟဲ…ဆရာက မေးဆိုတော့လည်း မေးပြီဗျာ….

ဒီလိုလေဆရာရဲ့….အချို့တွေ တားဆေးနေ့တိုင်းသောက်နေရဲ့နဲ့ ကိုယ်ဝန်ရသွားတာမျိုးကြားဖူးတယ်ဗျ….အဲ့ဆေးကရော စိတ်မချရဘူးလားဗျ?

ဆရာဝန်တွေကတော့ ညွှန်းကြတာပါပဲ…

ဒါပေမယ့် ကလေးရတဲ့သူလည်း ရသွားတာပတ်ဝန်းကျင်မှာ တွေ့နေရတော့ ကျွန်တော်တော့ဖြင့် ဒီဆေးကို သိပ်သဘောမတွေ့လှဘူး။

ကျွန်တော် – အင်း….ဆေးကတော့စိတ်ချရပါတယ်ဗျ….တစ်ခုရှိတာက …..ပထမဆုံးအနေနဲ့ သက်တမ်းကုန်ဆုံးရက်က စပြောမယ်ဗျာ။ ဒီဆေးလည်း ကွန်ဒုံးတို့ အခြားကုန်ပစ္စည်းတို့လိုပဲ သက်တမ်းကုန်ဆုံးရက်(Expired Date)ရှိတယ်ဗျ….

ရက်လွန်နေတဲ့ဆေးသောက်မိရင်တော့ ဆေးအာနိသင်က လျော့နည်းသွားပြီမို့ ကိုယ်ဝန်မတားနိုင်တော့ရင် ဆေးကိုအပြစ်ပြောလို့ မရဘူးလေ။အဲ့တော့ ပထမဆုံးပြောချင်တာကတော့ ဆေးဝယ်ရင် သက်တမ်းကုန်ဆုံးရက် (Expired Date)လေးစစ်ဆေးပြီးမှ ဝယ်သောက်ကြဖို့ပါ။

ဦးတုတ်ကြီး – ဟုတ်ကဲ့ပါဆရာ

ကျွန်တော် – နောက်ထပ်အဖြစ်များတဲ့ အကြောင်းရင်း (၄)ခုရှိသေးတယ်။ကျွန်တော်လည်း ဒီလိုလူနာပါးတဲ့ရက်လေး ပြောပြရတာ….

ကဲ…ဦးတုတ်ကြီး…စိတ်ရှည်လက်ရှည်နားထောင်ဖို့သာ ပြင်ထားတော့၊ အချိန်ရတယ်မလား?

ဦးတုတ်ကြီး – ရတာပေါ့ဆရာရယ်….ကိုယ့်ဆရာကတောင် ကျွန်တော့်ကို တကူးတက အချိန်ပေးပြီးရှင်းပြသေးတာပဲ…. ကျွန်တော်ကနားထောင်ရမှာပေါ့….ပြီးရင် အခြားအသိမိတ်ဆွေတွေကိုလည်း တစ်ဆင့်တဆင့်ပြန်မျှဝေလို့ရတာပေါ့….ပြောသာပြောပါဆရာ….

ကျွန်တော် – ကဲ…ပြောဆိုတော့လည်း…ပြောပြီဗျာ

နံပါတ် ၁ ကခုနကပြောတဲ့ Expired Date စစ်ဆေးပြီးဝယ်ဖို့ပေါ့။

နံပါတ် ၂ ကတော့ ဆေးကို အချိန်မှန်သောက်ဖို့ပေါ့…နေ့တိုင်းတော့ ဆေးသောက်ပါရဲ့ ….ဒီနေ့မနက်သောက်လိုက်..နောက်နေ့ကျနေ့လည်သောက်…နောက်တစ်ရက်ကျ ညသောက်….အဲ့လိုမျိုးဆေးသောက်တော့သောက်တယ်….အချိန်ကိုမှန်မှန်ကန်ကန် မသောက်တော့ကျ ဆေးအာနိသင်က စွမ်းသင့်သလောက်မစွမ်းတော့ဘူးပေါ့ဗျာ။အဲ့တော့ ဆေးသောက်ချိန်လေးကို ဂရုတစိုက်နဲ့မှန်မှန်လေးသောက်ရင်တော့ စိတ်ချရတာပေါ့ဗျာ။

ဦးတုတ်ကြီး – ဟုတ်ကဲ့ပါဆရာ…..နောက်အချက်တွေ ဆက်ပြောပါဦးဗျ

….ဆရာ့ဆီတစ်ခါတစ်ခါလာရင် အတော်ဗဟုသုတရသဗျာ….

ကျွန်တော် – နံပါတ် ၃ အချက်ကတော့ ဆေးစသောက်တဲ့ရက်…

ရာသီစလာလာချင်းရက်မှာစသောက်တယ်ဆိုရင် ဆေးစသောက်တဲ့ရက်မှာတင် အမျိုးသားနဲ့အတူနေလို့ရတယ်။အဲ့လိုမဟုတ်ဘဲ ရာသီစက်ဝန်းရဲ့ အခြားရက်မှာစသောက်တာဆိုရင်တော့ ပိုစိတ်ချရအောင် တစ်ပတ်လောက်ရှောင်ရင်ရှောင်၊ဒါမှမဟုတ်….အဲ့ဆေးစသောက်တဲ့ တစ်ပတ်အတွင်း အကာအကွယ်(ကွန်ဒုံး)သုံးပြီး အတူနေသင့်တယ်။

နံပါတ် ၄ အချက်ကတော့ တစ်ကဒ်ကုန်တာနဲ့ နောက်တစ်ကဒ်အဆက်မပြတ်ဆက်သောက်ဖို့ပဲ။ပထမတစ်ကဒ်ကုန်လို့ နောက်တစ်ကဒ်ဆက်တိုက်ဆက်သောက်တာဆိုရင်တော့ အပေါ်ကပြောသလို တစ်ပတ်ရှောင်စရာမလိုတော့ဘူး။

နောက်ဆုံး နံပါတ် ၅ အချက်ကတော့ ဆေးသောက်ဖို့မေ့တဲ့ကိစ္စ….

ဆေးသောက်ဖို့မေ့သွားမှတော့ အာနိသင်ကလျော့ပြီလေ….

ဦးတုတ်ကြီး – တစ်ရက်လောက်မေ့သွားရင်ရော မရဘူးလားဗျ…

တစ်ရက်သောက်ဖို့မေ့တာနဲ့ ကိုယ်ဝန်ရသွားနိုင်ရောလား?

ဘယ်လိုမှပြန်လုပ်လို့မရတော့ဘူးလားဆရာ?

ကျွန်တော် – အဲ့လိုတော့လည်း မဟုတ်ပါဘူး။ တစ်လုံးမေ့တာ၊ နှစ်လုံးမေ့တာ၊သုံးလုံးမေ့တာ…နောက်ပြီး ဆေးကဒ်ရဲ့ ပထမတန်းမှာမေ့တာ၊ ဒုတိယတန်းမှာမေ့တာ၊တတိယတန်းမှာနေ့တာ၊နောက်ဆုံးတန်းမှာမေ့တာ…စတာတွေပေါ်မူတည်ပြီး ဆေးပြန်သောက်ရမှာတွေ၊အခြားလုပ်ရမှာတွေရှိတယ်။အဲ့ဒါတော့ ခုပြောလည်း
ဦးတုတ်ကြီးမှတ်မိမှာမဟုတ်လို့် နောက်မှ ကျွန်တော်ဆောင်းပါးတစ်ပုဒ် ရေးပြီး လူအများသိအောင် အင်တာနက်ကနေမျှဝေမယ်ဗျာ။

ဦးတုတ်ကြီး – ဟာ…ကောင်းတာပေါ့ဆရာရယ်…အင်တာနက်ကဆိုတော့ လူအများကြီးဆီရောက်တာပေါ့…

ကျွန်တော် – ဟုတ်တယ်ဗျ…အချို့မိန်းကလေးတွေက မသိတာ ရော…မမေးရဲတာရောနဲ့ မလိုချင်ဘဲကိုယ်ဝန်တွေရသွားတာဗျ။

အင်တာနက်မှာဆိုတော့ သူတို့လေးတွေဖတ်မိရင် သူတို့လည်း အကျိုးရှိ၊ ကျွန်တေယ်လည်း ကုသိုလ်ရတာပေါ့ဗျာ။

ကဲ….ဒီနေ့တော့နည်းနည်းနောက်ကျနေပြီ…နောက်တစ်ရက်လောက် အားရင်လာခဲ့ပါဦးဗျာ….

အခြား သားအိမ်တွင်းထည့်တဲ့ပစ္စည်းတွေကို စနစ်တကျမသုံးရင် ကိုယ်ဝန်ရနိုင်တာကြောင်း ကျွန်တော်ထပ်ရှင်းပြပါဦးမယ်။

ဦးတုတ်ကြီး – စိတ်ချဆရာ….ဆရာ့ဆေးခန်းလူရှင်းတာနဲ့ ကျွန်တော်ဝင်လာခဲ့ပါမယ်…..

ဒေါက်တာမျိုး (UM1)