ဓာတ်မတည့်မှုကြောင့် ဖြစ်သောနှင်းခူနာ

ဆောင်းဝင်လာပြီ ဆိုရင် ပန်းနာရင်ကြပ်၊ ချောင်းဆိုး၊ အအေးမိ အပြင် နောက်ထပ်ဖြစ်နိုင်တာ တစ်ခုကတော့ နှင်းခူနာပေါ့။ အသားတွေပက်၊ အက်ကွဲပြီး ဆေးခန်းရောက်လာတတ်ကြတယ်လေ။ နှင်းခူနာ ဆိုတာ ဓာတ်မတည့်မှုကြောင့် ဖြစ်တတ်တဲ့ အရေပြားနာတစ်မျိုးဖြစ်ပါတယ်။

နှင်းခူနာ ဘာကြောင့် ဖြစ်တာလဲ။

ပုံမှန်အရေပြားက အစိုဓာတ်ကို ထိန်းထားနိုင်ပြီး ဘက်တီးရီးယားပိုးမွှားများနှင့် အမှုန်အမွှား၊ ဓာတ်ပစ္စည်းတွေ ဝင်ရောက်မှုမှ ကာကွယ်ပေးပါတယ်။ သို့သော် အရေပြားက မျိုးရိုးဗီဇပြောင်းလဲမှုကြောင့် ကာကွယ်နိုင်စွမ်းကျသူတွေမှာ ဓာတ်မတည့်တဲ့ အရာတွေကို မကာကွယ်နိုင်တော့ဘဲ နှင်းခူနာတွေ ဖြစ်ကြပါတယ်။

ဘယ်လို လူတွေမှာ ပိုဖြစ်တတ်ပါသလဲ။

  • ဓာတ်မတည့်မှုကြောင့် ဖြစ်တတ်ပြီး မျိုးရိုးလိုက်တာကြောင့် မိသားစု မျိုးရိုးထဲမှာ နှင်းခူနာဖြစ်တဲ့သူ၊ ဓာတ်မတည့်တာတွေရှိသူ၊ ပန်းနာရင်ကြပ်ရှိသူတွေမှာ ပိုဖြစ်တတ်ပါတယ်။
  • ထို့ကြောင့် ဖုန်၊ အမှုန်ထူထပ်ပြီး စပါးရိတ်တဲ့ ဆောင်းရာသီတွေမှာ ပိုဖြစ်လေ့ရှိကြပါတယ်။

ဘယ်လိုလက္ခဏာတွေ တွေ့ရမှာလဲ။

လူတစ်ယောက်နှင့် တစ်ယောက် ဖြစ်ပုံလက္ခဏာချင်း မတူတတ်ကြပါဘူး။

  • အရေပြားခြောက်သွေ့မယ်။
  • ယားယံမယ် ( အချို့ဆို ဆိုးဆိုးရွားရွားယားယံပြီး ညဘက်မှာ ပိုဆိုးတတ်ပါတယ်)
  • အသားမှာ နီစပ်စပ်၊ ညိုခြောက်ခြောက် အကွက်တွေဖြစ်လာတတ်တယ်။ (အထူးသဖြင့် ခြေ၊ လက်၊ ခြေကျင်းဝတ်၊ လက်ကောက်ဝတ်၊ လည်ပင်း၊ ရင်ဘတ်၊ မျက်ခွံ၊ တံတောင်၊ ဒူးတွေမှာ ပိုဖြစ်တတ်ပါတယ်။)
  • အရေကြည်ဖုလေးတွေ ပေါက်မယ်။
  • အရေပြားကွဲအက်ပြီး အဖတ်အဖတ်တွေနဲ့ အကြေးခွံတွေလိုဖြစ်နေတတ်တယ်။
  • အရေပြား ကြမ်းလာပြီးရောင်လာတာမျိုးလည်းရှိပါတယ်။

ဓာတ်မတည့်တာဖြစ်လို့ ငယ်စဉ်ကပင် စဖြစ်တတ်ပါတယ်။

ဘယ်လိုကုသရမလဲ။

ကိုယ်နဲ့ မတည့်တဲ့ အစားအသောက်တွေ၊ အရာဝတ္ထုတွေနဲ့ မထိတွေ့ မစားသောက်အောင် နေထိုင်ရပါမယ်။ အစိုဓာတ်ထိန်းပေးတဲ့ အရေပြား ခရင်တွေ moisturizer တွေ အဆီ လိမ်းပစ္စည်းတွေ လည်း သုံးပြီး ကာကွယ်နိုင်ပါတယ်။

နှင်းခူနာဖြစ်လာပြီဆိုရင် စောစောစီးစီးသေချာစွာ ကုသတာအကောင်းဆုံးပါ။

  • ယားယံမှုနှင့်ရောင်ရမ်းမှုကို သက်သာစေတဲ့ လိမ်းဆေး
  • ရောဂါပိုးဝင်နေပါက ပဋိဇီဝဆေးပါတဲ့ လိမ်းဆေး
  • ရောင်ရမ်းသက်သာစေတဲ့ သောက်ဆေး စတာတွေနဲ့ကုသရပါမယ်။

ဘယ်လိုအခြေအနေမှာ ဆရာဝန်နဲ့ပြသသင့်သလဲ။

  • ဝေဒနာခံစားရတာကြောင့် နေ့စဉ် လုပ်ငန်းဆောင်တာတွေ၊ အိပ်ရေးတွေ ပျက်လာမယ်ဆိုရင်
  • ပိုးဝင်တဲ့ လက္ခဏာတွေ( ပြည်တည်တာ၊ ရောင်လာတာ) ပြရင်
  • အိမ်မှာ ကုနေသော်လည်း မပျောက်ရင် ဆရာဝန်နဲ့ တိုင်ပင်သင့်ပါတယ်။

အကယ်၍ ကလေးတွေမှာ ပိုးဝင်တဲ့ ပုံစံတွေအပြင် အဖျားပါတက်နေပြီ ဆိုရင် ဆေးရုံ၊ ဆေးခန်းကို ချက်ချင်း သွားရောက်ပြသရပါမယ်။

ရီချို(ဆေး ၁)