ပန်းနာရင်ကြပ်သမားတို့သည် နေထိုင်မှု ပုံစံကို ပြုပြင်ခြင်းဖြင့် ပန်းနာရင်ကြပ် အမောဖောက်ခြင်းများမှ ကာကွယ်ကာ သက်တမ်းစေ့ နေထိုင်နိုင်ပါသည်။

၁။ ဓာတ်မတည့်သော ပစ္စည်းများကို သတိပြု ရှောင်ကြဉ်ပါ။
-အလွန်မွှေးသော ရေမွှေးများ၊ ပန်းများ အသုံးမပြုသင့်ပါ
-အိမ်တွင်း ကားတွင်းထားသော ပရုတ်လုံးများ၊ စပရေးများ၊ လေသန့်စေရန် ဖြန်းသော air fresherများကို အနံ့မပြင်းပါစေနှင့်
-မီးသွေးမီးဖို မသုံးသင့်ပါ
-ဆနွင်းမှိုင်း တိုက်ခြင်း ရှောင်ကြဉ်ပါ
-ရွက်ကြွေများ ရှို့ခြင်း မပြုလုပ်ရ
-အမွေးတိုင်၊ ခြင်ဆေးခွေ မသုံးသင့်ပါ
-ဆေးလိပ်ငွေ့ အစရှိသော အငွေ့များ မတည့်သဖြင့် ဆေးလိပ်မသောက်သင့်ပါ
-ဖုန်မှုန့်၊ သဲမှုန့်၊ ပိုးဟပ်ချေး အစရှိသော အညစ်အကြေး အမျိုးမျိုးကို သတိပြုပါ
-အစားအစာကို ဓာတ်မတည့်ခြင်း ရှိပါက ပင်လယ်စာ၊ ပုစွန် အစရှိသော မိမိမတည့်သောအစားအစာကို ရှောင်ကြဉ်ပါ
-အက်စ်ပရင် တည့်မတည့် ဂရုပြုပါ။ အက်စ်ပရင်ကြောင့် ထကြွသော ပန်းနာရင်ကြပ်ဟူ၍ ရှိပါသည်။
-လေ့ကျင့်ခန်းကြောင့် ရင်ကြပ်တတ်ပါက ပြင်းထန်သော လေ့ကျင့်ခန်းများနှင့် ကိုယ်လက်လှုပ်ရှားမှုများ မပြုလုပ်ရပါ
-တိရစ္ဆာန်အမွေးများလည်း ဓာတ်မတည့်ဖြစ်တတ်သဖြင့် တိရစ္ဆာန်မွေးမြူခြင်းမှ ရှောင်ကြဉ်ပါ

၂။ ဆေးများကို ကိုယ်နှင့်မကွာ ဆောင်ယူပါ
– ပန်းနာရင်ကြပ် သမားတို့သည် မိမိတို့ ရှူနေကျ ဂေါက်တံလေးများ၊ သောက်နေကျဆေးများကို ဆေးအိတ်ကလေးနှင့် သီးသန့်ထားရှိကာ သွားလေရာ ဆောင်ယူကြရမည်။
-မိမိ သောက်သုံးနေသော ဆေးများ၏ ဆိုးကျိုးများကို သိရှိကာ ဆရာဝန် ညွှန်ကြားသည့်အတိုင်းသာ မှီဝဲပါ

၃။ ဆေးများ အလွန်အကျွံ သောက်မိခြင်း
ပန်းနာရင်ကြပ် ဝေဒနာရှင် တစ်ဦးအနေနှင့် ဆေခန်းသွားသက် ကြာမြင့်လာသောအခါ မိမိဘာသာ ဆေးချိန်ဆခြင်းများ ပြုလုပ်တတ်လာကြသည်။ ထိုအခါ အောက်ပါ ဆိုးကျိုးများ ဖြစ်ပေါ်လာနိုင်ပါသည်။
– Salbutamol ရှူဆေး/သောက်ဆေးအား လိုသည်ထက်ပို၍ အနေချောင်စေရန် ရှူခြင်း သောက်ခြင်း ပြုလုပ်ပါက ရင်တုန်ခြင်း၊ ခြေတုန်လက်တုန် ကတုန်ကယင်ဖြစ်ခြင်းများ ဖြစ်တတ်သည်။
– Steroidပါသော ဆေးများ မိမိသဘောနှင့်မိမိ သောက်သုံးပါက သွေးတိုးခြင်း၊ ဖောယောင်ခြင်း၊ ကိုယ်ခံအားကျခြင်းတို့ ဖြစ်နိုင်ပါသည်။

၎။ တုပ်ကွေးမမိအောင် ဂရုစိုက်ပါ
-တုပ်ကွေးမိခြင်း၊ အအေးမိခြင်းတို့သည် ပန်းနာရင်ကြပ် ဖောက်စေနိုင်သဖြင့် သတိထားရန် လိုအပ်ပါသည်။ တတ်နိုင်ပါက တုပ်ကွေးကာကွယ်ဆေး ထိုးထားပါ။

ဒေါက်တာယမင်း(ဆေး ၁)