ရေကြီးပြီး ဖြစ်တတ်သောရောဂါများ

ရေကြီးတဲ့အခါ မြင့်တက်လာတဲ့ ရေပြင်ကြီးနဲ့ အတူ စိုးရိမ်စိတ်တွေ သောကတွေလည်း တူတူမြင့်တက်ကြရစမြဲပါ။ အဝေးက စာနာပေးရသူတွေအတွက်တောင် ပူလောင်လှတဲ့ ‘ရေဘေး’ ဟာ ‘ရေ’ကျသွားရင်တောင် ဆက်မြင့်တက်ဒုက္ခပေးနေမဲ့ပြဿနာတွေ ဘက်ပေါင်းစုံမှာ ရှိနေပါသေးတယ်။

အထူးသဖြင့် ဒီလို ကျန်းမာရေးပြဿနာတွေက ဆက်ဒုက္ခပေးနေတတ်ပါတယ်။

🎯 ကူးစက်ရောဂါများ

▪ရေမသန့် အစားအသောက်မသန့်နိုင်တဲ့ အခြေအနေကြောင့် အူရောင်ငန်းဖျားရောဂါ၊ ကာလဝမ်းရောဂါ၊ leptospirosis ရောဂါနဲ့ အသည်းရောင်အသားဝါ(အေ) အမျိုးအစားရောဂါတွေ ဖြစ်နိုင်ပါတယ်။

▪နေရာထိုင်ခင်း မသန့်ခြင်း လျှော်ဖွတ်ဖို့ အဝတ်အစားမသန့်ခြင်း ကြောင့် အရေပြားမှာ ယားနာရောဂါအမျိုးမျိုး ဖြစ်နိုင်ပါတယ်။

▪စိုစွတ်အေးမြတဲ့ အခြေအနေနဲ့ စိတ်ဖိစီးမှု လူပင်ပန်းမှုတွေကြောင့် ကိုယ်ခံအားကျဆင်းတတ်တာမို့ အအေးမိခြင်းနဲ့ ရာသီတုပ်ကွေးလိုရောဂါတွေလည်း ဝင်လာတတ်ပါတယ်။

▪ခြင်တွေပိုပေါက်ဖွားဖို့ အခြေအနေပေးတာမို့ ခြင်ကတဆင့် ကူးစက်တဲ့ သွေးလွန်တုပ်ကွေးရောဂါ၊ ငှက်ဖျားရောဂါနဲ့ ဆင်တုပ်ကွေးလို ရောဂါမျိုးတွေ ပိုဖြစ်လာနိုင်ပါတယ်။

🎯 မတော်တဆ ထိခိုက်မှုများ

ရေကြီးနေစဉ်မှာ ပိုဖြစ်နိုင်ပေမဲ့ ရေကြီးပြီးပြန်လည်ထူထောင်ရေးလုပ်ရတဲ့ ကာလမှာလည်း ပုံမှန်မဖြစ်သေးတဲ့ မြေပြင်အခြေအနေ ပတ်ဝန်းကျင်အခြေအနေကြောင့် မတော်တဆမှုတွေ ထိခိုက်ရှနာတွေဖြစ်နိုင်ပါတယ်။ စိုစွတ်ပြီး မသန့်ရှင်းတဲ့ အခြေအနေလည်းဖြစ်တာမို့ အနာပိုးဝင်ဖို့ ပြည်တည်ဖို့ ပိုလွယ်ကူစေပါတယ်။

🎯 မြွေပါးကင်းပါးအန္တရာယ်

ရေကြီးတုန်းမှာ ပါလာပြီး တင်ကျန်နေခဲ့တတ်တဲ့ မြွေ ၊ ကင်း နဲ့ အခြား အဆိပ်ရှိသတ္တဝါတွေ အန္တရာယ်လည်း ရှိတာမို့ သတိထားဖို့လိုပါတယ်။

🎯 စိတ်ကျန်းမာရေး ပြဿနာများ

ရေစကြီးကတည်းက စဖြစ်ရတဲ့ စိုးရိမ်ကြောက်လန့်မှု၊ နေရာထိုင်ခင်းအသစ်တွေနဲ့ ကယ်ဆယ်ရေးစခန်းတွေမှာ နေသားမကျအဆင်မပြေမှု၊ အသက် အိုးအိမ် စည်းစိမ် ဆုံးရှုံးမှုတွေက ရေဘေးသင့်သူတိုင်းကို စိတ်ပိုင်းဆိုင်ရာဝေဒနာတွေ ဖြစ်ကျန်နေစေတတ်ပါတယ်။

နဂိုစိတ်ပိုင်းဆိုင်ရာကြံ့ခိုင်သူ၊ စိတ်ပိုင်းရောရုပ်ပိုင်းပါ ပံ့ပိုးမှု လုံလောက်စွာရသူတွေ၊ အဆုံးအရှုံးမကြီးမားခဲ့သူတချို့တွေမှာ ထိခိုက်မှု နည်းနိုင်ပေမဲ့ လူတော်တော်များများမှာတော့ စိတ်ဖိစီးမှုရဲ့ နောက်ဆက်တွဲပြဿနာတွေ၊ Depressionဆိုတဲ့ စိတ်ကျရောဂါ ၊ Anxiety ဆိုတဲ့အစိုးရိမ်လွန်ရောဂါနဲ့ Post Traumatic Stress Disorder လို ပြန်ပျောက်ဖို့ခက်တဲ့ စိတ်ဒဏ်ရာဝေဒနာတွေ ဆက်ဖြစ်သွားတတ်ပါတယ်။

နှစ်သိမ့်ဆွေးနွေးမှုတွေ စိတ်ပိုင်းဆိုင်ရာပံ့ပိုးမှုတွေပါ လုံလောက်အောင်ပေးဖို့ အရေးကြီးပါတယ်။

အားလုံးပြန်လည်ကျန်းမာပျော်ရွှင်နိုင်ကြပါစေ…

Dr ဖြိုးဝေလင်း
(22.8.19)