တုပ်ကွေးအကြောင်း သိကောင်းစေရာ

တုပ်ကွေးရောဂါ ကမ္ဘာတွင်ဖြစ်ပွားနေခဲ့သည်မှာ နှစ်ရာချီမက ရှိနေပြီဖြစ်ပါသည်။ ပုံမန်အားဖြင့် နှစ်စဉ် ရာသီအကူးအပြောင်းကာလများတွင် အဖြစ်များပြီး သာမန်လက္ခဏာများသာ ဖြစ်တတ်သော်လည်း တစ်ခါတစ်ရံ ရောဂါပြင်းထန်ကာ အသက်သေဆုံးနိုင်သည့်အပြင် လူအများသို့ လျင်မြန်စွာ ကူးစက်ပြန့်နှံ့သော ကပ်ရောဂါအသွင် ဖြစ်တတ်ပါသည်။

ထို့ကြောင့် တုပ်ကွေးရောဂါအကြောင်းကို သာမက တုပ်ကွေးဖြစ်စေသော ပိုးမွှားများအကြောင်းကို သိထားပါက ရောဂါ၏သဘောသဘာဝကိုသိရှိပြီး ကာကွယ်နိုင်မည်ဖြစ်ပါသည်။

တုပ်ကွေးရောဂါဆိုသည်မှာ အဘယ်နည်း။

  • တုပ်ကွေးရောဂါဆိုသည်မှာ လေမှတစ်ဆင့် ကူးစက်သော ဗိုင်းရပ်ပိုးကြောင့်ဖြစ်သော အသက်ရူလမ်းကြောင်း ရောဂါတစ်မျိုးဖြစ်ပေသည်။
  • ထို့ကြောင့် ရောဂါဖြစ်ပွားသူသည် ချောင်းဆိုးခြင်း၊ နှာချေခြင်းဖြစ်ပါက နှာခေါင်းနှင့် ပါးစပ်ကို လုံခြုံစွာ အုပ်ထားခြင်းဖြင့် သူတစ်ပါးအား မကူးစက်အောင် ကူညီရာရောက်ပါသည်။

တုပ်ကွေးရောဂါပိုးဟူသည် အဘယ်နည်း။

  • တုပ်ကွေးရောဂါပိုးသည် အချွဲမြှေးများတွင် ကပ်ညှိနေထိုင်သော အသက်ရူလမ်းကြောင်းဗိုင်းရပ်ပိုး (Orthomyxovirus) အုပ်စုဝင်တစ်မျိုးဖြစ်သည်။ အရွယ်အစားအလွယ်သေးငယ်ပြီး အမျိုးအစားကွဲများစွာရှိကာ မျိုးရိုးဗီဇအမျိုးမျိုးကို လျင်မြန်စွာ ပြောင်းလဲနိုင်စွမ်းရှိသော ပိုးအမျိုးအစားဖြစ်ပေသည်။
  • ထို့ကြောင့် တစ်နှစ်နှင့် တစ်နှစ် ဖြစ်ပွားသော ပိုးအမျိုးအစားကွာခြားလေ့ရှိပြီး တုပ်ကွေးကာကွယ်ဆေးများ ရှိသော်လည်း ထိုကာကွယ်ဆေးများသည် တုပ်ကွေးရောဂါအားလုံးကို မကာကွယ်နိုင်ပါ။ ဥပမာ။ ။ ကာကွယ်ဆေးတွင် မပါဝင်သော ပိုးကြောင့်ဖြစ်သောတုပ်ကွေး၊ ဗီဇပြောင်းသွားသော ပိုးကြောင့်ဖြစ်သော တုပ်ကွေးကို ကာကွယ်နိုင်စွမ်းမရှိပါ။
  • နှစ်စဉ်ကာကွယ်ဆေးများကို ပြောင်းလဲသွားသော ပိုးအလိုက် ပြန်လည် ထုတ်လုပ်နေရလေ့ရှိပါသည်။

လူကို ကူးစက်နိုင်သော တုပ်ကွေးရောဂါပိုးမည်မျှရှိပါသနည်း။

  • Orthomyxovirus အုပ်စုအောက်တွင် တုပ်ကွေးရောဂါပိုး ခေါ် Influenza virus A, B, C, D, Isavirus, Thogotovirus, Quaranjavius စသည်ဖြင့် အမျိုးအစားများစွာရှိသော်လည်း တုပ်ကွေးရောဂါပိုး အေ၊ ဘီ၊ စီတို့သာ လူကိုအဓိကကူးစက်ပါသည်။
  • လူကိုသာမက ကျောရိုးရှိသွေးနွေးသတ္တဝါများ (ငှက်၊ ဝက်၊ ခွေး၊ လင်းနို့) တို့ကိုပါ ရောဂါဖြစ်စေပါသည်။
  • အများဆုံးဖြစ်သော တုပ်ကွေးရောဂါပိုးမှာ တုပ်ကွေးရောဂါပိုး အေဖြစ်ပါသည်။
  • ယခုဖြစ်ပွားလျက်ရှိသော ဝက်တုပ်ကွေး၊ လူတုပ်ကွေး၊ ငှက်တုပ်ကွေး အားလုံးတို့သည် ရောဂါပိုး အေမှ ဆင်းသက်ပြောင်းလဲလာသော ပိုးများသာဖြစ်ပေသည်။

မည်သို့ကူးစက်တတ်ပြီး မည်သို့ကာကွယ်နိုင်ပါသနည်း။

  • တိရစ္ဆာန်မှတစ်ဆင့် ကူးစက်ခြင်းရှားပါးသော်လည်း ကူးစက်နိုင်ပါသည်။ ထို့ကြောင့် တိရစ္ဆာန်များကို ကိုယ်တွယ်အစာကျွေးပြီးတိုင်း လက်သန့်ရှင်းရေးပြုလုပ်ပေးရပါမည်။ အထူးသဖြင့် မွေးမြူရေးခြံလုပ်သားများသည် ရောဂါကာကွယ်သည့် အဝတ်အစား အပြည့်အစုံ ဝတ်ဆင်သင့်ပါသည်။
  • ရောဂါဖြစ်နေသူ၏ ရူထုတ်သောလေမှတစ်ဆင့် ကူးစက်တတ်ပါသည်။ ထို့ကြောင့် ရောဂါရှိသူမှ ချောင်းဆိုးနှာချေသောအခါ လက်ကိုင်ပုဝါအသုံးပြုခြင်း၊ ပါးစပ်နှင့် နှာခေါင်းကို လုံခြုံစွာ ပိတ်၍ ချောင်းဆိုးခြင်း၊ နှာခေါင်းစည်းတပ်ခြင်းတို့ဖြင့် သူတစ်ပါးအားမကူးစက်အောင်ကူညီနိုင်ပါသည်။ ရောဂါမရှိသူသည် နှာခေါင်းစည်းအသုံးပြုနိုင်သော်လည်း ပိုးသည် အလွန်သေးငယ်သောကြောင့် သာမန်နှာခေါင်းစည်းများသည် ပိုးဝင်ရောက်ခြင်းကို အနည်းအကျဉ်းမျှသာ ကာကွယ်ပေးနိုင်ပါသည်။
  • ပိုးနှင့် ထိတွေ့ထားသော မသန့်ရှင်းသောလက်၊ ပစ္စည်းများနှင့်ထိတွေ့ခြင်းမှလည်း ကူးစက်နိုင်ပါသည်။ ထို့ကြောင့် တုပ်ကွေးရောဂါကို ကာကွယ်နိုင်သော အကောင်းဆုံးနည်းလမ်းမှာ လက်ဆေးခြင်းဖြစ်ပါသည်။
  • ကာကွယ်ဆေးထိုးနိုင်သော်လည်း မိမိထိုးထားသောပိုးအမျိုးအစားမဟုတ်သည့် အခြားသောတုပ်ကွေးပိုးများကို မကာကွယ်နိုင်ကြောင်း သတိချပ်ရပေမည်။
  • ထို့အပြင် မိမိကိုယ်ကို ခုခံအားကောင်းအောင် နေထိုင်စားသောက်ခြင်း၊ လေကောင်းလေသန့်ရရှိအောင် ဆောင်ရွက်ခြင်း၊ လူထူထပ်သောနေရာများ ရှောင်ကြဉ်ခြင်း တို့ဖြင့်လည်း ကူးစက်မှုကို လျော့ချနိုင်ပါကြောင်း ဖော်ပြလိုက်ပါသည်။

ရီချို(ဆေး ၁)